Bans a Killin - Louise Bennett

So yuh a de man me hear bout! Ah yuh dem seh dah teck Whole heap a English oat seh datyuh gwine kill dialec! Meck me get it straight, mas Charlie, For me no quite understand – Yuh gwine kill all English dialec Or jus Jamaica one? Ef yuh dah equal up wid English Language, den wha meck Yuh gwine go feel inferior when It come to dialec? Ef yuh cyaan sing 'Linstead Market' An 'Water come a me yeye’ Yuh wi haffi tap sing 'Auld lang syne’ An ‘Comin through de rye'. Dah language weh yuh proud a, Weh yuh honour an respec – Po Mas Charlie, yuh no know se Dat it spring from dialec! Dat dem start fi try tun language From de fourteen century - Five hundred years gawn an dem got More dialec dan we! Yuh wi haffi kill de Lancashire, De Yorkshire, de Cockney, De broad Scotch and de Irish brogue Before yuh start kill me! Yuh wi haffi get de Oxford Book A English Verse, an tear Out Chaucer, Burns, Lady Grizelle An plenty a Shakespeare! When yuh done kill 'wit' an 'humour', When yuh kill 'variety', Yuh wi haffi fine a way fi kill Originality! An mine how yuh dah read dem English Book deh pon yuh shelf, For ef yuh drop a 'h' yuh mighta Haffi kill yuhself!